అమరావతి పాలకుడు ఎవడు?

అమరావతి పాలకుడు ఎవడు?
జానపద వాగ్మయం అనేక సత్యాలు చెబుతుంది. అందులో అనేకం వినికిడి సత్యాలు మాత్రమే వుంటాయి. నేదునూరి గంగాధరంగారు సేకరించగా, జయధీర్ తిరుమలరావుగారు పరిష్కరించిన పుస్తకంలో ఇలా వుంది...
‘‘
యోగవిద్య
మొదటి ప్రతాపరుద్రుడు (1140-1196). ఈయనకు ముక్కంటి దేవుడు, రుద్రదేవుడు అనే పేర్లున్నాయి. ఈయన యోగాభ్యాసం చేసి యోగ బలమున నిత్యము కాశీకి పోయి స్నానము చేసి, భార్యయగు అంబికా దేవికి తెలియకుండగ, ఆమె మేల్కొనక ముందే మరల వచ్చెడివాడు.
ఒకసారి ఈ విషయాన్ని ఆమె గ్రహించి తాను కూడా భర్త యోగబలంతో కాశీ వెళ్లింది. అయితే అక్కడ ఆమె బహిష్టురాలయింది. ఆ దోషం వల్ల ప్రతాపరుద్రుడి యోగవిద్య నశించింది. అక్కడ వున్న బ్రాహ్మణులను పిలిచి భార్యాసమేతంగా తన రాజధాని అయిన ధరణికోటకు (అమరావతి) చేర్చవలసిందిగా వేడుకున్నాడు. బ్రాహ్మణులు షరతు విధించారు. వచ్చే పన్నెండేళ్లలో దారుణమైన కరవు రాబోతున్నది. మమ్మల్ని ఆదుకుంటే.. నీకు ఆ యోగబలాన్ని పునరుద్ధరిస్తాం అన్నారు. ప్రతాపరుద్రుడు సరేనన్నాడు. రాజు, రాణిగార్లను శుద్ధులను చేసి క్షణమాత్రంలో ధరణికోటకు చేర్చారు. ఈ కథ నంద చక్రవర్తి, నందవరీకుల సంబంధముగ వినుకొండదండ కవిలెలో వున్నది
’’
మొన్నెవరో ... కాకతీయుల దానం వెలగపూడి అని రోతరాతలు రాసిన నేపథ్యంలో ఈ జానపద విజ్ఞాన వ్యాసంలోని ఈ వాక్యాలు కనిపించి కొంచెం చారిత్రక హాచ్చర్యం కలిగింది.